СДСМ реагираше на најавите за поскапување на струјата и предупреди дека тоа ќе биде уште еден удар врз џепот на граѓаните.
Според Атансако Тунески од СДСМ , поради недостаток од инвестиции во гасификацијата, струјата претставува основен енергенс и нејзиното поскапување ќе предизвика понатамошно зголемување на цените на основните продукти.
„Сакаме да ја предупредиме владата, дека во оваа незапаметена економска криза и рекордна сиромаштија, поскапувањето на струјата ќе биде огромен удар по џебот на граѓаните, но и генератор на нова инфлација и поскапување на производите кај компаниите.
Неприфатливо е зголемениот увоз на струја поради намаленото домашно производство и зголемените трошоци во производството на ЕЛЕМ, трошоците за рекламни кампањи на државните ЕЛЕМ и МЕПСО од кои некои надминуваат и милион евра, загубите заради несовесното работење, да бидат основа за барање на ново поскапување на струјата. За потсетување, во последните 6 години струјата двојно поскапи, а зголемените приходи од тоа поскапување не се вложуваат во нови производни капацитети.
Директорите на ЕЛЕМ и МЕПСО ги фрлаат зголемените приходи за непродуктивни кампањи, генералните директори се возат во возила што чинат над 100 илјади евра, и се позајмуваат пари на приватни акционерски друштва. Наместо сето ова, ЕЛЕМ и МЕПСО треба да се насочат кон подобрување на перформансите на своите компании, да спроведат проекти за штедење и со тоа да го спречат поскапувањето на струјата.“, рече Тунески.