Најконкурентна економија во светот годинава е таа на Швајцарија, следена од Сингапур, САД, Финска и Германија, покажува годишниот извештај за глобалната конкурентност на Светскиот економски форум.
Успехот на швајцарската економија се должи на нејзината ефикасност, иновациите и макроекономската стабилност.
Швајцарија сепак се соочува со тешкотии за наоѓање квалификувани работници. Во првата десетка на најконкурентни држави се Јапонија, Хонгконг, Холандија, Велика Британија и Шведска.
Во регионот Македонија се наоѓа на 63. позиција, зад Бугарија која е на 54. место, а пред Црна Гора на 67. позиција, Словенија на 70. место, Хрватска на 77 позиција, Грција на 81 место, Србија на 94. позиција и Албанија на 97. место.
Во извештајот нема податоци за Босна и Херцеговина и Косово. На последно место годинава е економијата на Гвинеја.
Оценката во извештајот е формирана врз основа на рангирање на институциите, инфраструктурата, здравството и образованието, големината на пазарот и макроекономската средина.