Стопанската комора на Северна Македонија ја поздрави одлуката на Уставниот суд за поништување на Законот за данок на солидарност, со што, како што наведуваат, се потврдила исправноста на аргументите што бизнис-заедницата ги изнесувала во изминатиот период.
– Од самиот почеток, Комората доследно укажуваше дека ваквото законско решение, особено со неговата ретроактивна примена за фискалната 2022 година, сериозно ја загрозува правната сигурност и предвидливоста на деловниот амбиент. Одлуката на Уставниот суд ја потврдува исправноста на ставот дека селективното и ретроактивно оданочување не е соодветен механизам за економско регулирање и испраќа важна порака за почитување на правната сигурност, која е клучен предуслов за економски раст и за привлекување на нови инвестиции, се наведува во соопштението од Комората.
Како најголема бизнис-асоцијација во земјата, се вели во соопштението, Комората настапила институционално преку формални дописи, аргументации и правни механизми, а иницијативата била поддржана од Управниот одбор, Надзорниот одбор, Собранието на Комората, Советот на странски инвеститори и други бизнис-асоцијации.
– Очекуваме во иднина секоја даночна политика да биде темелно анализирана и креирана во консултација со бизнис-заедницата, со цел да се избегнат негативни ефекти врз економијата. Стопанската комора останува посветена на транспарентен дијалог со институциите за создавање на одржливи економски политики што ќе го поттикнат растот и развојот на стопанството, велат од Стопанска комора на Северна Македонија.