СДСМ ја обвини Владата дека завршната сметка за буџетот за 2012. година доцни 3 месеци, а тоа претставува прекршување на законот и побара од пратениците да не ја прифатат завршната сметка за буџетот. Потпретседателот на СДСМ, Ванчо Узунов, истакна дека СДСМ се уште стои на ставот дека е потребно кривично санкционирање на ова дело, за да не се избегнува морална и политичка одговорност во иднина.
– Владата се изјасни дека доцнењето со завршната сметка било заради „техничка причина“. СДСМ смета дека барањето на такво оправдување од страна на Владата претставува многу срамен чин, кој не доликува на една влада. Во однос на ребалансот на буџетот за 2013 година, прво, добро е што Владата ја послуша опозицијата и направи ребаланс.
– Тој е неопходен, како што укажавме уште пред 3 месеци. Но, СДСМ смета дека треба да се направи ребаланс со намалување на непотребните расходи за оваа година, а не со зголемување на дефицитот (долгот) на речиси 4 проценти од БДП, вели Узунов.
Како што вели Узунов, зголемувањето на дефицитот, потврдува дека приходите во буџетот за 2013-та година се нереално испланирани и нема да може да се остварат.