Компанијата „Катар Холдинг“, која има инвестициски проекти во над 30 земји во светот, се интересира за зимскиот центар Попова Шапка, но и за изградба на голем спа комплекс преку добивање концесија за термоминерални води, соопшти министерството за економија.
Генералниот и главен извршен директор на компанијата, Ахмад Мохамед Ал-Сајед, на средбата со министерот за економија, Ваљон Сарачини, пројави интерес и за влез на „Катар Холдинг“ во електроенергетскиот сектор во Македонија, преку докапитализацијата на АД ЕЛЕМ, изградба на хидроцентралите Чебрен и Галиште и реализиација на проектот Вардарска долина.
Според соопштението, Сарачини информирал дека по изборот на консултант ќе биде направена анализа и ќе биде предложена најдобрата структура за докапитализација на АД ЕЛЕМ, но ја објаснил и постапка за концесии во делот на минералните богатства.
Со цел понатамошно унапредување на договорната рамка меѓу двете држави, министерот Сараќини потпиша меморандум за разбирање за туристичка соработка меѓу двете земји, а беше потпишан и меморандум за соработка меѓу стопанските комори на Македонија и Катар.
Досега Македонија и Катар досега имаат потпишано договори за избегнување двојно оданочување, за соработка во сферата на образованието, во земјоделството и за заемна заштита на инвестициите.