Руската рубља падна за време на тргувањето во петокот во Москва на најниската вредност во однос на американскиот долар од првиот месец од војната во Украина. Курсот од 96 рубљи за еден долар е продолжение на континуираниот пад на вредноста на руската валута од почетокот на оваа година, кога еден долар вредеше околу 65 рубљи, што е пад од околу 30%.
Вредноста во петокот беше најниска од 28 март 2022 година, објави државната новинска агенција ТАСС. Откако Русија испрати свои војници во Украина кон крајот на февруари 2022 година, рубљата падна на 120 во однос на доларот, но брзо закрепна бидејќи руската централна банка презеде акција.