Вредноста на вкупната трговска размена на Македонија во периодот јануари-мај годинава изнесува 4.675.277.000 евра.
Како што објави денеска Државниот завод за статистика, извозот на стоки од Македонија, во првите пет месеци годинава изнесува 1.964.512.000 евра, и бележи пораст од 15,1 процент во однос на истиот период од претходната година.
Вредноста на увезената стока, пак, изнесува 2.710.765.000 евра, што е за 12,1 процент повеќе во споредба со истиот период лани.
Трговскиот дефицит, во периодот јануари-мај годинава изнесува 746.253.000 евра. Покриеноста на увозот со извоз, во првите пет месеци од годинава изнесува 72,5 проценти.
Трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, фероникелот и облеката. Во увозот најмногу се застапени платината и легурите на платина, необработени или во прав, нафтените масла и маслата добиени од битуменозни минерали (освен сурови), другите метали од платинската група и нивни легури, необработени или во облик на прав и електричната енергија.
Во периодот јануари-мај годинава, според вкупниот обем на надворешно-трговската размена, Македонија најмногу тргувала со Германија, Велика Британија, Грција, Србија, и Бугарија.