Жителите на Велгошти, Охридско, за десетина дена ќе добијат реконструирана и соодветно адаптирана спортска сала, соопштија од Агенцијата за млади и спорт.
Од АМС информираат дека интензиво се работи на адаптација и реконструкција на салата и дека градежните работи се во завршна фаза. Според динамикaта спортската сала би требало да биде готова пред предвидениот рок, доколку тоа го дозволат временските услови.
– Со изградбата на салата, повеќе од 290 деца ќе имаат каде да ги одржуваат своите часови по физичко и здравствено образование со што уште еднаш, АМС покажува дека се грижи за населението, но и ги исполува своите ветувања. Спортската сала во Велгошти започна да се гради во 2002 година во непосреда близина на Основното училиште Живко Чинго. Но, истата никогаш не беше целосно завршена со градба. Во изминатата деценија истата пропаѓаше поради својата недограденост, а беше и руинирана, се вели во соопштението од АМС.
Реконструкцијата на салата, Агенцијата за млади и спорт, ја почна на 21 септември оваа година, а рокот на завршеток на градежните работи е предвиден за три месеци. Вредоноста за реконструкцијата, санацијата и адаптацијата на спортскиот објект е 23,6 милиони денари, а финансиските средства Агенцијата за млади и спорт ги обезбеди преку Владата на Република Македонија.
– АМС во јули годинава им вети на жителите на Велгошти дека ќе добијат реконструирана спортска сала и непрестано работи на оваа реализација, соопштуваат од агенцијата.