Полска го забрани увозот на жито и друга храна од Украина за да го заштити својот земјоделски сектор, изјави владин претставник.
Големи количества украинско жито, кое е поевтино од она што се произведува во Европската унија, завршило во Полска и другите централноевропски земји, што ги урна цените и ја погоди продажбата на локалните фармери. Ова, пак, создаде политички проблем за владејачката партија Право и правда во изборната година.
„Ние сме и остануваме непроменети пријатели и сојузници на Украина. Ќе ја поддржуваме и ја поддржуваме…Но, должност на секоја држава, секоја влада, добра влада во секој случај е да ги заштити интересите на своите граѓани“, рече лидерот на партијата Јарослав Качински.
Качински рече дека Полска е подготвена да започне преговори со Украина за решавање на проблемот со житото и дека украинската страна е веќе информирана за одлуката.