„Заедно до подобри политики за рурален развој“ е насловот на денешната средба што ја организира проектот „Национален рурален парламент како глас на руралното население – НРП“, наменета за граѓанските организации од Југоисточниот плански регион кои активно работат на полето на руралниот развој.
Ова е втора од вкупно планираните осум средби кои треба да се одржат во периодот мај/јуни во секој од планските региони на Македонија за да се идентификуваат активните граѓански организации и да добијат можност за размена на искуства и идеи за нивна поголема вклученост во креирањето политики поврзани со руралниот развој.
НРП почна да се спроведува во март годинава, а ќе трае 30 месеци. Целта е да го зајакне влијанието на граѓанското општество врз локалните и националните политики поврзани со руралниот развој, преку зголемување на капацитетот на руралните граѓански организации за вмрежување и застапување. Проектот е финансиран од Европската унија. Го спроведуваат три партнерски организации: Фондацијата за поврзување на природни вредности и луѓе, Мрежата за рурален развој на Република Македонија и Акција за рурален развој.