На свечена церемонија во Солун денеска официјано ќе биде означен стартот на изградбата на „Трансјадранскиот гасовод“ на територијата на Грција, јави ТАСС.
Според најавите, на церемонијата ќе присуствуваат грчкиот премиер Алексис Ципрас, министерот за животна средина и енергетика на Грција, Панос Скурлетис, како и министрите за енергија на Азербејџан и Бугарија, Натиг Алиев и Темнужка Петкова.
Покрај нив, на церемонијата е најавено и присуство на потпретседателот на Европската комисија и еврокомесар за енергетика Марош Шефчович и на специјалниот пратеник и координатор за меѓународни енергетски прашања на американскиот Стејт Департмент, Ејмас Хокстеин.
Гасоводот ТАП ќе започнува на грчко-турската граница на Марица, минувајќи преку териториите на северна Грција, јужна Албанија и дното на Јадранското Море и ќе завршува во јужниот дел на Италија.
Преку овој гасовод ќе се пренесува природен гас од азербејџанските наоѓалишта во реонот на Каспиското Море до корисниците во Грција, Албанија и Италија и понатаму во западна Европа.