Во Дојран денеска се одржа првиот меморијален Куп на Македонија во спортски риболов, во дисциплината ловење крап.
Натпреварот што се одржа на езерцето „Истатов“, а на кој учествуваа 10 екипи, го следеше и министерот за земјоделство, шумарство и водостопанство Љупчо Димовски. Тој изразувајќи благодарност до организаторите на Купот, им ги додели наградите на најдобрите екипи и поединци и најави дека преку програмите на министерството ваквите активности секогаш ќе се поддржуваат.
– Овие манифестации на Македонија и се потребни за да покажеме убавина и да промовираме можности за развој на туризмот, истакна Димовски и додаде дека Министерството за земјоделство, шумарство и водостопанство ќе оддели околу еден милион денари за порибување на Дојранското езеро со автохтона риба и за понатамошен развој на спортскиот риболов како привлечна туристичка атракција.
Денеска беше најавено дека државното првенство во спортски риболов ќе се одржи во Дојран на 17-ти мај.