Зголемување на економската размена и интензивирање на меѓуграничната соработка се главни теми на Македонско-бугарските бизнис експо денови што ќе се одржуваат денеска и утре во Штип и Кочани.
Пред дваесетина градоначалници од двете земји и претставници на 50 компании ќе бидат презентирани финансиските потенцијали и условите за кредитирање од страна на двете државни банки за развој.
На форумот ќе присуствува вицепремиерот и министер за финансии Зоран Ставрески. Најавен е и заменик-претседателот на Владата на Република Бугарија задолжен за економски еазвој Даниела Бобева.
Компании од Македонија и Бугарија ќе постават свои штандови на платото пред Ректоратот на Универзитетот „Гоце Делчев“ во Штип – Ново Село. Деловните партнери од двете држави се очекува да остварат и непосредни бизнис контакти. Во Кочани ќе се организира панел дебата за заеднички проекти од меѓуграничната соработка, нивно финансирање и поголема искористеност на ЕУ фондовите за оваа намена.
Организатори на експо деновите се Македонско-бугарската стопанска комора, општините Штип и Кочани, Центарот за развој на Источно-планскиот регион и Универзитетот „Гоце Делчев“.