Се подлабоката криза во Грција станува „многу опасна“, но засега нема показатели дека таа може да се прошири и во другите периферни земји на еврозоната, оцени денеска вториот човек на Банката на Англија, Џoн Канлиф.
– Во моментов нема такви сигнали. Финансиските пазари не покажуваат дека кризата предизвикана од грчката презадолженост се шири и во други земји од периферијата, изјави Канлиф во интервју за Би-Би-Си.
Под терминот „периферни држави“ на еврозоната се подразбираат земјите од Јужна Европа, кои се соочуваат со поголеми економски проблеми – Шпанија, Италија и Португалија.
Канлиф изразува надеж дека Атина и нејзините кредитори ќе успеат да ги возобноват преговорите за грчкиот долг по референдумот на 5 јули, на кои би се изнашле начини за да се избегне излегување на Грција од евроозната.
– Длабоко се надевам дека тоа ќе се случи. Според мене, грчката Влада и грчкиот народ јасно покажаа дека сакаат да останат во евроозната, нагласи Канлиф, додавајќи дека таков став изразуваат и партнерите на Грција.
Британскиот министер за финансии Џорџ Озбор веќе најави дека Владата во Лондон е подготвена да преземе се што ќе биде потребно за да ја заштити економијата на Велика Британија во овој неизвесен период.