Со легализирање на земјоделските објекти фармерите стануваат финансиски помоќни, а тоа им отвора можности за користење средства од ИПАРД Програмата, изјави денеска заменик министерот за земјоделство, шумарство и водостопанство Зоран Коњановски по денешната посета на Регионалната канцеларија на Федерацијата на фармери (ФФРМ) во Струмичко.
Согласно измените на Законот за земјоделско земјиште, постапката за легализација на шталите, оранжериите и останатите земјоделски објекти, е драстично поедноставена. Се сведува на поднесување барање до локалната власт и изработка на градежен елаборат.
Коњановски апелира производителите што поскоро да почнат и со регистрирање на земјоделската механизација, тракторите и приклучните машини, процес што го овозможи Владата со најновите измени на Законот за сообраќај.
– Со писмена изјава пред нотар и доставување барање за регистрација до надлежните органи на МВР, може да почне легализацијата на овие машини, истакна заменик министерот.
Мерките чие спроведување овозможи легализирање на објектите и машините во земјоделството се дамнешни барања на фармерите. За полесно спроведување на овие активности ФФРМ на своите членови ќе им издаде прирачници.
– Легализацијата и регистрацијата на тракторите и останатите земјоделски машини ќе овозможи контрола на нивната техничка исправност. Со тоа генерално ќе се зголеми и безбедноста во сообраќајот на локалните и регионалните патишта, изјави претседателот на Федерацијата Андрија Секуловски, додавајќи дека годишно се евидентираат и по сто сообраќајки со земјоделска механизација во кои најчесто страдаат млади луѓе.
Легализацијата на земјоделските објекти треба да заврши до август идната година, а легализацијата и регистрацијата на механизацијата до октомври 2013.