Болно, чиста уцена, казнен и нетолерантен, се дел од коментарите на грчките политичари за договорот постигнат меѓу Кипар и еврозоната за планот за спас во вредност од 10 милијарди евра, пишува „Катимерини“.
Портпаролот на грчката влада Симос Кедикоглу изјави дека Кипар немал голем избор, но оти прифаќање на значителни загуби за големите депозити е дел од зделката.
– Договорот го спречува излезот од еврозоната и хаосот кој би настанал, изјави Кедикоглу.
Лидерот на ПАСОК, Евангелос Венизелос коментира дека силите во еврозоната, особено Германија, одлучиле да дадат пример со Кипар со тоа што „ќе ја казнат земјата“.
Претседателот на Грција Каролос Папуљас за договорот меѓу Кипар и „тројката“ рече дека е „нетолерантен и селективен“.