Европската комисија продолжува со плановите за обезбедување задолжителни резерви на гас, осмислени за да се стави крај на зависноста на Европската унија од руските фосилни горива.
Во нацрт-верзијата на документот на Еврокомисијата се наведува дека земјите-членки на ЕУ треба да изнајдат начини секоја година до 1 ноември да обезбедат 90-процентна исполнетост на капацитетите за складирање гас. Според драфт-верзијата извршната власт на ЕУ уште планира да врши контроли на состојбите со складираниот гас пред посочениот датум.
Предлогот што се очекува да биде објавен утре произлегува од зголемената загриженост во ЕУ за снабдувањето со енергија, после заканата на Русија дека би можела да ги намали испораките на гас како одговор на санкциите што ЕУ ги воведе против Мосвка поради инвазијата врз Украина.
Другите предлози посветени на мерките за редовност во обезбедувањето гас вклучуваат задолжителен систем за лиценцирање, за земјите-членки на ЕУ да имаат поголеми овластувања врз компаниите што стопанисуваат со капацитетите за складирање гас.
Извор: МИА