Технолошкиот гигант „Епл“ во следните пет години планира да ги зголеми своите инвестициски планови во САД на 430 милијарди долари, соопштувајќи дека тоа ќе создаде околу 20.000 нови работни места, јавуваат медиумите.
Ревидираниот план вклучува повеќе од милијарда долари за нов кампус и Инженериски центар во областа на истражувачкиот триаголник во Северна Каролина.
Епл, исто така, планира да инвестира „десетици милијарди долари во развој на силикон од новата генерација и иновации во 5Г во девет држави во САД“, се наведува во соопштението.
Технолошкиот гигант со седиште во Калифорнија соопшти дека ја зголемува својата цел од 2018 година за 350 милијарди долари инвестиции откако Конгресот донесе мерка за намалување на даноците за повратен профит за американските компании.
-Во ова време на закрепнување Епл ја удвои својата посветеност кон американските иновации и инвестиции во производство, достигнувајќи до заедници во сите 50 сојузни држави, изјави извршниот директор на Епл, Тим Кук.
„Ние создаваме работни места во врвни области – од 5Г, преку силиконски инженеринг, до вештачка интелигенција, инвестирајќи во следната генерација на нови иновативни бизниси и целата наша работа градиме позелена и поправедна иднина,“наведува компанијата.
Веста доаѓа откако „Епл“ и другите технолошки гиганти се соочија со зголемени антимонополски контроли за нивната зголемена доминација во клучните економски сектори, што се зголемија за време на пандемијата. Големите технолошки компании, исто така, се погодени од даночните реформи и во САД и на глобално ниво.
Епл соопшти дека компанијата е „најголемиот даночен обврзник во САД“ и дека во последните пет години платила речиси 45 милијарди долари внатрешни корпоративни даноци на добивка.
Компанијата соопшти дека е на пат да ја исполни својата цел од 2018 година за создавање 20.000 нови работни места во САД до 2023 година и дека со својата последна обврска очекува да создаде уште 20.000 во следните пет години.