Чешката енергетска компанија ,,ЧЕЗ” ја разгледува можноста за вложување во германските термоелектрани и рудници, кои на продажба ги нуди шведската енергетска групација „Ватенфал“.
Според директорот на чешката фирма Даниел Бенеш, целта е да се задржи нејзината големина, со оглед на тоа што при падот на цените на електричната енергија, се намалуваат приходите, јави дописникот на МИА од Прага.
„Ватенфал“, која е во државна сопственост, лани објави дека сака да го продаде својот уделот во термоелектраните и електроцентралите во Германија.
„ЧЕЗ“ која веќе е на пазарот во Романија, Бугарија и Полска најави купување на дветретински удел и во Словачките електрани, кој го продава италијанската компанија „Енел“.
Нето профитот на „ЧЕЗ“, која е најголема чешка енергетска групација, според последните податоци, за првите три квартали од минатата година, бележи пад за 38 проценти на 783 милиони евра.
Приходот, на годишно ниво е намален за девет проценти на 5,8 милијарди евра и според експертите се очекуваат слични податоци и оваа година.