Францускиот министер за индустриски развој Арно Монтебур смета дека еврото е прескапо и истовремено упати остра критика против Европската централна банка (ЕЦБ).
– Европа треба да направи како Јапонија. Како што сега стојат работите, еврото е преценето и се заканува на економскиот раст во Европа. Централната банка е премногу пасивна, истакна Монтебур во интервјуза Шведското радио.
Францускиот министер смета дека државата треба да ја управува економијата и вели дека еврото треба да соодветствува на доларот, токму како што беше на почетокот.
Решение за намалување на девизниот курс, според Монтебур, е да се отпечатат и пуштат во оптек повеќе евро-банкноти во Европа. Притоа, тој ги отфрла контрааргументите за закана од пораст на инфлацијата.
– Да, од едноставна причина дека не постои некаков притисок во економиите денес, вели министерот Монтебур.