Завршена е електронската аукција за доделување државно земјиште за изградба на фотоволтаични електрани со вкупна инсталирана моќност до 19 мегавати со што се очекува во буџетот да се слеат над два ипол милиони евра, информира денеска вицепремиерот за економски прашања Кочо Анѓушев.
За денеска, како што најави, планирана е електронска аукција за една 10 мегаватна и три електрани од по еден мегават.
– Тендерската постапка покажа дека компаниите не само што не бараа премиум, што значи дека државата тоа ќе ја чини нула премиуми во иднина, туку се натпреваруваат да дадат повеќе пари, рече Анѓушев, додавајќи дека досега државата за ова на годишно ниво трошела над милиони евра за субвенции.
Во обраќањето на денешната презентација на Стратегијата за енергетика до 2040 година, Анѓушев потсети дека вчера е потпишан и договор за „Осломеј“ за 10 мегаватна фотоволтаична електрана чиј инвеститор е Електрани на Северна Македонија. Договорот е потпишан на седум милиони евра што е пониска цена во однос на планираните 8,7 милиони евра.