Во Ликовниот салон во Велес синоќа беше отворена 18. самостојна ликовна изложба на Мирјана Крстева Масети, како дел од активностите на манифестацијата „Велес-Град на културата 2015“.
Уметницата Крстева Масети на својата прва изложба во Велес се престави со 35 слики: акрил и цртеж на платно, насликани во последните две – три години од нејзиното творештво.
За творештвото на Крстева Масети пред присутните говореше и изложбата ја отвори Љубица Кондијанова, директор на Музејот на Град Скопје. Делата, оцени, се творени со љубов и истрајност, со свој ликовен израз и специфичен естетски однос.
– Секоја слика е свет за себе, свет за импресија, но и свет на доживување. Секоја од нив е одмерена, лирски интонирана. Нејзиното сликарство е полно со креативна енергија, совршена ликовна физиономија и индивидуалност, како и нејзината мисловна и ликовна ангажираност која предизвикува возбуда и естетска радост на еден сензитивен творец со нагласена експресија, израз и многу конструктивна топлина, потенцира Кондијанова.
Крстева Масети учествувала и на 60 групни изложби во земјава и странство, а добитник е и на повеќе награди и признанија.