Во организација на Епархијата Повардарска и „Македонскиот манифест“, синоќа во Велес беше промовиран зборникот „Името е нашата татковина“.
Пред присутните се обрати митрополитот Повардарски Агатангел, а за значењето на делото говореа некои од авторите и воедно промотори, Ристо Никовски и Ефтим Клетников.
Авторот Ефтим Клетников говорејќи за зборникот појасни дека самото нејзино име „Името е нашата татковина“ ни говори кое е значењето.
– Зборникот има големо значење,зошто упатува порака за додатно освестување на Македонецот да си го зачува сопствениот идентитет и покрај сите силни притисоци од меѓународната заедница,од ЕУ,САД и Грција, а која што е нивни пулен во тој спор за жал, а човек треба да биде многу неинтелегентен да не го согледа тоа, потенцира Клетников.
Тој појасни дека зборникот кој е двојазичен македонски и англиски, ја толкува македонската генеза од изворот до денешни дни. Воедно информира дека ќе го дистрибуираат во Амбасадите и некои европски авторитети во Брисел и други земји.
– Целта е да видат дека овој македонски народ не е неимун за зачувување на својот идентитет и дека има цврста волја и по цена на својот живот да го сочува идентитетот.Сето тоа, затоа што многу генерации гинеле за името и опстојувањето. Ние денеска како генерација немаме право по било каква основа да си играме со името, нагласи Клетников.
Промоцијата беше збогатена со настап на младинскиот црковен хор „Свети Кирил и Методиј“ , а под диригенство на Веселинка Маџарова.