Пред платото на Кривопаланечкиот музеј денес на пладне ќе се одржи традиционалната манифестација „Велигденска традиција“, која по четврти пат ја организираат локалната установа Градски музеј и општина Крива Паланка.
-Манифестацијата е посветена на велигденските обичаи и традицијата поврзана со чествувањето на големиот христијански празник Велигден и има цел зачувувања на традиционалните вредности и надополнување на Велигденските празнувања.
Пред музејот денес ќе владее вистинска празнична атмосфера со велигденска трпеза на која ќе се дегустираат слатки и солени специјалитети од овој крај, ќе бидат изложени велигденски изработки и украсени велигденски јајца, приготвени од учесниците од најразлична возраст, информира Драган Величковски, директор на ЛУ Градски музеј, Крива Паланка.
Настанот има натпреварувачки карактер, предвидени се парични награди за најубаво украсено велигденско јајце, најубава рачно изработена декорација со велигденски мотиви и за победникот во натпреварот за најцврсто јајце.
На овој централен настан му претходеше работилница посветена на обичаите поврзани со овој голем христијански празник кои повозрасните им ги пренесоа на помладите. Присутните ќе можат да ги дегустираат специјалитетите кои како и декорациите ќе се продаваат по симболична сума, а средствата ќе бидат наменети за хуманитарни цели.