„Вечер на изведувачка поезија и музичко-сценски перформанс на Јухо Кууси (Финска)“ ќе се одржи вечер во организација на Културно-социјален простор Центар-Јадро.
Како што соопштија организаторите, настанот е еден од финалните продукти на едномесечниот резиденцијален престој на слем-поетот и социјалниот едукатор од Финска, Јухо Кууси.
Во рамките на резиденцијалниот престој кој се реализира во периодот од 20 ноември до 13 декември годинава, финскиот поет и гостин на КСП Центар-Јадро во Скопје одржа серија на работилници за слем-поезија и изведувачка поезија со македонски поетеси и поети. Меѓу нив учествуваа Елена Пренџова, Сандра Авросиевска, Дамијан Каранфилов Гулев, Даница Ивановска Лепојевиќ, Цветанка Колева, Тања Кузманоска, Игор Поп-Трајков и Светлана Купенкова. Тие ќе настапат на вечерта на изведувачка поезија со нивните нови дела создадени во рамки на работилниците.
По настапот на македонските поетеси и поети, гостинот од Финска Јухо Кууси, ќе има музичко-поетски перформанс, на кој ќе настапи со комбинација на неговата авторска поезија и музика.
– Јухо Кууси е двократен победник на Финска во слем-поезија, со над десет-годишно изведувачко искуство во Финска и интернационално. Неговите песни се објавувани во книжевни списанија и антологии, а својата дебитанска книга поезија ќе ја издаде во 2020 година. Кууси предава уметност на изведување поезија на млади и возрасни во образовни институции од различни степени во Финска, се наведува во соопштението.