Во Домот на културата во Кавадарци синоќа беше пуштана во употреба реновираната салата за фолклор. Во неа се одржуваат пробите на фолклорниот ансамбл Тиквеш од овој град, кој директорот на културниот дом Владимир Темков го нарече културен амбасадор на градот, кој успешно се претставува во светот.
-Идејата за реновирање дојде од Претседателството и членовите на Ротари клубот од Кавадарци. Бев воодушевен затоа што за прв пат се случи такво нешто во историјата на дејствувањето на домот, некој да се сети и да донира за потребите на културата и да направи нешто што ќе остане како трајна придобивка. Овде вежбаат над 130 деца, нагласи директорот.
Претседателот на Ротари клубот Бранко Колев потсети дека е ова само еден од многуте нивни проекти. Тој нагласи дека континуирано инвестираат и даваат донации. Ги наброја фитнес центарот на отворено, игралиштето за деца, проектите во образованието и здравството. Го најави и реновирањето на детското одделение при општата болница во Кавадарци.