Првата фестивалска прес-конференција на Интернационалниот фестивал на филмската камера „Браќа Манаки“ во Битола ја одржа Mеѓународното стручно жири.
Годинава, оценувањето и доделувањето на највисоките фестивалски признанија, наградите златна, сребрена и бронзена „Камера 300“ ќе ги вршат истакнати режисери, кинематографери, продуценти и филмски работници – Срѓан Драгојевиќ од Србија, Симон Таншек од Словенија, Ребека Толи од Велика Британија, Лазар Секуловски од Македонија и претседателот на жирито, Ѓора Бејах од Израел.
– Прекрасно се чувствувам во оваа прекрасна држава и во ова прекрасно место, бидејќи во Битола доаѓам по втор пат. Очекувам да погледнам добри филмови за што сум запознат од фестивалската програма. Наградите ќе ги добијат филмовите кои ќе обезбедат најдобар резултат, истакна претседателот на стручното жири, Израелецот Бејах, кој посака да го проба прекрасното црвено македонско вино, за кое, вели, надалеку се слуша.