Македонската опера и балет вечер премиерно ќе ја изведе претставата „Балетска вечер на Бурнонвил“ – ретроспектива за творештвото на данскиот и светски реномиран кореограф Аугуст Бурнонвил (1805-1879).
Како што информираше МОБ, „Балетска вечер на Бурнонвил“ е трилогија составена од инспирациите на авторот од три земји: Франција, Италија и Шпанија.
– Насловите на трите делови на делото се: Конзерваториум, Фестивал на цвеќето и Прозорецот. Авторската екипа која ја пренесува кореографијата на Бурнонвил е работена на музика од Паули, Лумбие, Холм, Хелстед, поставена е и режирана од Ева Клоберг и Франк Андерсен од Данска, соопшти МОБ.
Сценограф е Зоран Николовски, костимограф Марија Пупучевска, концерт-мајстор е Климент Тодороски кој, исто така, ќе настапи и како солист на виолина. Оркестарот на МОБ ќе го води диригентката Бисера Чадловска.
„Балетска вечер на Бурнонвил“ репризно ќе биде изведена на 7 април.