Кинотечната институција „Синематики Мауи“ на хавајскиот остров Мауи минатата недела го прикажа филмот „Пред дождот“ на Милчо Манчевски, во рамките на „Мауи филм студиската група“, соопшти С-прес.
„Пред дождот“ беше дистрибуиран во американските киносали во 1995 и оттогаш се прикажува на американската телевизија, а ДВД дистрибуцијата во САД почна во 2009, кога престижниот „Критерион колекшн“ го издаде како дел од серијата филмски класици.
„Пред дождот“ на режисерот и сценарист Милчо Манчевски е најуспешен македонски филм – има освоено над триесет меѓународни награди, меѓу кои се и Златниот лав во Венеција, номинација за Оскар, Индепендент спирит во САД, филм на годината во Аргентина, Шведска, Турција и Италија.
„Њујорк тајмс“ го вброи меѓу 1.000 најдобри филмови на сите времиња. Филмот беше дистрибуиран со голем успех на сите континенти, а веќе со години е дел од наставната програма на голем број универзити низ светот (како и во средните училишта во Италија), се прикажува во кинотечни циклуси и влезен е во бројни филмски енциклопедии.