Поетско-музички перформанс „Љубовта е најважна“ ќе се одржи денеска во паркот пред Културно информативниот центар – Скопје.
– Изминатиов период, уште еднаш ни покажа дека и во непредвидливи, најтешки ситуации кои не можеме да ги контролираме, единствено љубовта е главниот двигател на човекот и таа му дава сила да издржи и да се прилагоди на сите предизвици. Не џабе низ векови од постоење на цивилизацијата, емпатијата и љубовта кон луѓето создавала „чуда“, а уметниците, писателите, актерите, музичарите љубовта ја земале како неприкосновна вечна инспирација во своите дела, велат од КИЦ-Скопје.
Токму настанот „Љубовта е најважна“, велат оттаму, ќе го посветиме на поезијата и музиката создадена од љубовната инспирација.
– На настанот делови од најубавата македонска поезија ќе чита Татјана Гогоска. Љубовните звуци ќе ги чуеме преку хармониката на Јовче Петковски и неговите ученици а сето тоа под модераторство на Валентина Ѓоргиевска- Парго, се вели во соопштението.
Настанот може да се проследи на Фејсбук страната на КИЦ – Скопје.