Поетски портрет на Виолета Танчева-Златева денеска ќе биде претставен во Друштвото на писателите на Македонија. Танчева-Златева е добитничка на наградата „Браќа Миладиновци“ на годинашните Струшки вечери на поезијата. За творештвото на поетесата ќе зборуваат Зоран Анчевски и Братислав Ташковски, а стиховите ќе ги чита Александра Велинова.
Претстижната награда „Браќа Миладиновци“ на СВП, за најдобра поетска книга во Македонија, Танчева-Златева ја доби за стихозбирката „Година без лето“, која жири комисијата ја оцени како иновантен и впечатлив поетски резултат во поновите текови на македонската литература.
Во образложението, меѓу другото, се истакнува дека Виолета Танчева-Златева остварува зрел стилски баланс на поетскиот израз што внимателно се држи до традиционалното пеење, но и со одмерено чувство за иновацијата и експериментот.
Книгата зрачи со ненаметлив и тивок лиризам, но и со умешно дозирани необични и свежи решенија кои поетскиот јазик на авторката го издигаат на високо рамниште од кое таа се јавува како еден од најиинтересните и најзрели поетски гласови во современите текови на македонската поезија.