Со комедијата „Претежно ведро“ на режисерот Марко Петри синоќа во кино Милениум беше отворен 9. Фестивал на новиот германски филм, кој под мотото „Го сакам филмот“ ќе трае до 16 октомври.
Ќе бидат прикажани 14 филмски наслови кои се пресек на најдоброто од новата германска кинематографија, во организација на Амбасадата на Германија во Скопје и банката со германски капитал ПроКредит.
Фестивалот, според германската амбасадорка во Македонија Гудрун Штајнакер, има за цел да придонесе во развојот на кинокултурата во неколку градови во нашава земја и повторно заживување на затворените кина.
– Со нетрпение го очекувам јубилејното 10. издание на Германскиот филмски фестивал, со кој ќе се одбележи германско-македонското филмско пријателство. Овој културен дијалог меѓу двете земји не би можел да се оствари без вашиот интерес и вашата поддршка за германскиот филм, Штајнакер на отворањето.
Градоначалникот на Град Скопје Коце Трајановски нагласи дека пораката на Германскиот нов филм е реална, а сцените од германската филмска продукција на кино платното најчесто го отсликуваат животот. На присутните им порача да бидат дел од 9. издание на Фестивалот на нов германски филм.
– Многу наскоро можете да станете дел и од филмската магија на 12. Фестивал на Европски филм што ќе се одржува во ноември во кино салите на Младинскиот културен центар, рече Трајановски.
Фестивалот од денеска ќе се реализира во киното Фросина во Младинскиот културен центар-Скопје. Покрај во Скопје од оваа година се одржува во девет градови низ Македонија: Тетово, Битола, Прилеп, Штип, Кавадарци, Струмица, Велес и Куманово.