Изложбата „Мојот универзум“, со која Националната галерија на Македонија (НГМ) го одбележува Меѓународниот ден на лицата со посебни потреби 3 Декември, беше отворена денеска во галеријата Чифте амам.
Изложбата е работена по моделот социјална инклузија. Станува збор за ликовни работилници кои НГМ ги организираше во соработка со три средни училишта – скопските гимназии „Орце Николов“ и „Јосип Броз Тито“ (учениците од Меѓународна матура) и училиштето „Партенија Зографски“ за деца со оштетен слух и говор. Изложбата на изработени дела ќе може да се посети во наредните денови.
– Изминатиот месец имаше неколкудневни ликовни работилници во кои децата сликаа на стакло, работеа со коноп, се дружеа и изработуваа преубави ликовни творби, рече Маја Димитрова, едукатор во Националната галерија на Македонија.
Додаде дека Меѓународниот ден на лицата со посебни потреби НГМ го одбележувала и изминатите години, но првпат на овој принцип. Со оглед на тоа дека децата, како што рече, уживале и се запознале меѓусебно, се надева дека вакви изложби ќе има многу повеќе во следниот период.
– Ние, како Национална галерија на Македонија, ги отвораме вратите кон ранливите категории и организираме изложби. Една од нив што ја организираме со години е по повод Светскиот ден на аутизмот, истакна Димитрова.