Ученици од ОУ„Никола Карев“ од Кочани учествуваат на 13.Меѓународен поетски фестивал „Замокот на Дуино“ кој се одржува од денеска до 2-ри април во Трст.
Учениците од ОУ „Никола Карев“ освоија специјална награда на оваа светска манифестација на која што учествуваат училишта и поединци од цел свет. Од Македонија награди доби само ОУ „Никола Карев“ од Кочани.
– Оваа година се твореше на тема „Моето наследство“ и ние со учениците одлучивме да твориме за наследствата кои што тие ги имаат добиено од своите баби и дедовци. Највпечатливо беше творењето на ученичката Наде Ефремова која што пишуваше за најголемото наследство кое што сите го добиваме, а тоа е нашата земја и слободата, рече Љупка Стојменова, ментор.
Учениците од тимот Ивона Антова, Василија Коцева, Наде Ефремова, Елена Јакимова и Драгана Насева, задоволни од учеството и од специјалната награда и радосни што ќе можат по втор пат во Италија лично ја подигнат наградата. Ова признание за нив претставува поттик да пишуваат и творат и понатаму и да создаваат дела за паметење.
– Јас и моите четири соученички изработивме книга од сите наши литературни творби кои што беа на тема „Моето наследство“. Наградата ќе ни биде поттик и понатаму да пишуваме и да твориме, рече Наде Ефремова, ученичка во ОУ „Никола Карев“.
Учениците се претставија со изработка на своја поетска книга составена од песни на македонски преведени на англиски јазик. Преводот на англиски јазик е на Панче Атанасов и Марија Дончева, професори по англиски јазик, а техничката изработка на книгата е на Благој Гранков.