Јавната локална библиотека „Илинден“ ќе организира општински натпревари за „Млади библиотекари во Делчево и Македонска Каменица. Натпреварот традиционално го организира Библиотекарското здружение на Македонија, а истиот годинава ќе се одржи по деветнаесети пат.
– Според правилата за организирање на натпреварот, учество можат да земат ученици и членови на локалните и училишните библиотеки на возраст до 14 години. Победниците на општинските натпревари ќе учествуваат на Републичкиот натпревар. Ние како библиотека во соработка со клонот на библиотеката во Македонска Каменица општинските натпревари треба да ги спроведеме најдоцна до 20 октомври 2018 година. Во договор со училиштата од М.Каменица и Делчево, ќе се одреди точниот датум на одржување на натпреварот, рече директорката на Јавната локална библиотека „Илинден“, Билјана Петровска.
Додаде дека учесниците на натпреварот во времетраење од 60 минути, писмено ќе одговараат на 20 прашања од Прирачникот за подготовка на кандидати. Согласно предвиденото библиотеката ќе формира тричлена комисија која ќе се грижи за правилноста на натпреварот.
Трошоците околу натпреварот Млади библиотекари ќе бидат на товар на ЈЛБ „Илинден“ Делчево.