Македонската академија на науките и уметностите и Универзитетот „Св. Кирил и Методиј“ денеска потпишаа Меморандум за соработка, со кој и формално ја потврдија долгогодишната соработка. Документот го потпишаа претседателот на МАНУ, академик Владо Камбовски, и ректорот на УКИМ, проф. д-р Велимир Стојковски.
Тие посочија дека формализирањето на соработката е симболичен чин, зашто МАНУ и УКИМ, како најстара и најголема високообразовна институција, соработуваат од нивното основање, а најголем дел од академиците во МАНУ произлегуваат од Скопскиот универзитет.
Целта на Меморандумот е двете институции да ги здружат своите научни потенцијали – човечки ресурси и истражувачка работа – кога аплицираат пред странските фондови.
– Со организиран настап на конкурсите на Европската унија многукратно ќе се зголемат средствата што таа ги нуди преку своите научни програми, рече ректорот Стојковски.
Академик Камбовски истакна дека меѓу 70 и 80 проценти од целата наука во Македонија е концентрирана само во нивните две институции.
– За жал, немаме конзистентна научна политика, немаме стратегија за развој на научно-истражувачката дејност… Треба да се поттикне и соработката со бизнис-секторот и да влијаеме на политиките на Владата зашто нема вработувања и подмладувања во науката, рече Камбовски.
Првите луѓе на МАНУ и на УКИМ пред присутните професори и академици соопштија за проектите кои се во тек или се планирани во 2014 година. Камбовски рече дека за оваа година МАНУ има 98 научно-истражувачки проекти, вклучително и тие од уметничкото творештво. Во соработка со Академијата на Бугарија, МАНУ има 34 проекти, а со Српската академија – седум проекти. МАНУ има и 40-ина самостојни проекти на одделенијата и истражувачките центри во нејзин состав.
Ректорот Стојковски соопшти дека во изминатите шест години максимално се користат ресурсите на УКИМ и дека се реализираат 62 меѓународни проекти преку различни програми за наука, како од ЕУ, УНЕСКО, МААЕ… како и 24 проекти кои УКИМ ги спроведува со сопствени средства.
Официјализирањето на соработката меѓу МАНУ и УКИМ беше поздравена од присутните професори и академици, кои оценија дека на овој начин науката ќе биде повеќе интегрирана. Имаше предлози да се формира тело што ќе ги координира активностите, МАНУ да потпише меморандуми за соработка и со другите универзитети во Македонија, како и да се поврзат со сите врвни македонски професори кои имаат кариера на светските универзитети.