По повод одбележувањето на 20-годишнината од воспставувањето дипломатски односи меѓу Македонија и Јапонија, вчера во концертната сала Асакуса во Токио се одржа концерт на кој настапија оперски уметници од Македонската Опера и Балет.
Пред полната сала сe обрати првиот резидентен амбасадор на Македонија во Јапонија Андријана Цветковиќ која истакна дека македонско-јапинските дипломатски односи во изминатите две децении се карактеризираат со меѓусебна почит и поддршка. Амбасадорката истакна дека иако Република Македонија е релативно непозната за Јапонија, преку културата, а особено со универзалниот јазик на музиката можат да се премостат географските и културните далечини, и токму затоа амбасадата во Токио во периодот кој следува ќе работи на продлабочување културната соработка меѓу двете земји.
Концертот беше отворен со македонската химна „Денес над Македонија се раѓа” и со јапонската „Кимидајо“.
Во првиот дел беше изведена македонско-јапонска суита за тенор и оркестар од Алесандро Д‘агостини, каде како солист настапи Благој Нацоски, а под диригентска палка на Борјан Цанев.
Во вториот дел беше изведена 9-та симфонија на Бетовен, исто така под диригенство на Борјан Цанев, а како солисти настапија: Славица Петровска-Галиќ, Ирена Кавкалеска, Ѓорѓи Цуцкоски и Игор Дурловски.
Македонските уметници беа придружувани од „Вагнер сосајати оркестра“ на Кеио Универзитетот и „Јапонско-македонскиот хор на пријателство“.
Главен организатор на концерот е јапонскиот бас и претседател на „Токио Опера” Kазухиро Kотецу, кој лани во Македонија ја отпеа „Болен ми лежи Миле Попјорданов“со што ја одушеви македонската публика.
Македонските уметници беа испратени со овации, аплауз и одушевување, а на паузата од концертот во холот се служеше македонско вино, информира Амбасадата на Македонија во Јапонија.