Во Галеријата на Друштвото на ликовни уметници на Русе, Бугарија, вечер ќе биде отворена изложба на девет македонски ликовни уметници, кои се составен дел од ликовната концепција „Конекција 2″ – иницирана од Културно-информативниот центар на Република Македонија во Софија.
По успешното претставување претходниот месец во Софија, „Конекција 2“ продолжува со серија изложби низ повеќе градови во Бугарија.
Македонските автори во Русе ќе се претстават со над 70 дела: графика, масла на платно, скулптури и дела изработени од метал.
Покрај досегашните учесници во овој проект, ликовните уметници Марјан Ѕин од Струмица, Иво Пецов од Виница, Адриана Јованоска од Прилеп, Зоран Мише и Павел Целкоски од Охрид, Иван Стоименов од Скопје и Горан Тричковски од Делчево, изложбата вечер ќе ги вклучи и Слободан Милошески од Кичево, докторанд по скулптура на Националната ликовна академија во Софија, и Јорданчо Ристовски од Крива Паланка, кој на оваа софиска академија е магистер по сликарство.