Во концертната сала на Музичката академија во Штип вечер ќе се одржи концерт во сеќавање на македонската пијанистка, универзитетски професор Стела Слејанска-Стојаноска, која е меѓу основачите на Универзитетот „Гоце Делчев“.
Покрај концертот ќе биде промовиран и документарен филм. Настанот го организира Универзитетот „Гоце Делчев“ – Штип и семејството.
На концертот ќе настапат дел од учениците кои под менторство на Слејанска-Стојаноска влегоа во светот на сериозната музика: Татјана Џорлева, Ангеле Михајловски, Сашка Панева и Христо Стојаноски.
– Со своето активно присуство на музичките сцени и фестивалски манифестации низ државава и во повеќе земји низ Европа и светот, Слејанска-Стојаноска беше етаблиран пијанист со силна репродуктивно-творечка имагинација и индивидуалност во интерпретацијата, наведуваат организаторите.
Од 2001 година Слејанска-Стојаноска беше член на Европското друштво за култура со седиште во Венеција, како и член на асоцијацијата „Музиката и уметноста во Европа“ – Париз. Добитник беше на голем број домашни и меѓународни награди и признанија, меѓу кои Орден за заслуги од областа на културата од Претседателот на Република Франција – „Витез од редот на академските палми“ во 2006 година.
Слејанска-Стојаноска почина во август минатата година, а овој концерт веќе втора година се одржува во нејзин спомен, на денот на нејзиниот роденден.