Во организација на Музичкото училиште „Стефан Гајдов“ синоќа во Ликовниот салон во Велес се одржа концерт, прв од мини турнејата на дуото пијанистки на пијано, Ана Гацева и Татјана Џорлева.
Тие настапија со популарни композиции од Жорж Бизе со „Детска игра“ и од Антонин Дворжак.
Двете пијанистки заедно за првпат настапиле во 2004 година, а концертот е второ нивно заедничко претставување.
Тие истакнаа дека е прекрасно чувството да се свири во дуо и оти имале прекрасна атмосфера на концертот.
– Исто дишиме и да ја восприемиме оваа музика, овие дела кои се ретко изведување на сцените во Македонија, изјави Ана Гацева.
Таа додаде дека овој и следните концерти и ги посветуваат на нивната професорка по пијано Стела Славјанска, која починала пред една година.
Според нивниот колега Илија Настовски, кој е професор по пијано во Музичкото училиште во Велес, концертот бил вистинско уживање во една сјајна и вешта изведба на познатите француски класици.
– Со извонреден пијанистички колорит креација, полна со динамична еластичност со спектар на ритмичко-фолклорни чувствувања и ретка музичка инспирација, делата на Бизе и Дворжак на еден поинаков на нив својствен начин на изведба допреа до срцата на љубителите на клисиката и им приредија еден час вистинско уживање, оцени Настовски.
Двете пијанистки во четврток ќе настапат во Кочани, на 13 ноември во Штип, а завршниот концерт ќе биде на 24 ноември во Скопје.