Годишна изложба на основните училишта од градот Скопје ќе биде отворена денеска во Националната галерија на Македонија, објект Чифте амам.
Учениците во соработка со ликовните педагози од основните училишта, работеа дела на конкретна тема – акварел. На изложбата ќе бидат изложени најкреативните и најинтересните дела од младите уметници во завршна изложба со дела изработени во акварелна техника. Изложбата е со натреварувачки карактер за да се зголеми мотивацијата и интересот на учениците.
Со изложбата Националната галерија на Македонија се залага за стимулирање на ликовната уметност во воспитно-образовниот процес во училиштата и презентирање во јавноста на индивидуалните и групните творби на најмладата популација од основните училишта во градот Скопје.
Организатор на изложбата е Маја Димитрова, едукатор во Националната галерија на Македонија.