Во Музеј на Град Скопје вечер ќе биде отворена изложба на Мирјана Крстева-Масети (1979), член на Друштвото на ликовните уметници на Македонија од 2010 година.
Дипломирала на Академијата за ликовна уметност во Благоевград, Бугарија (2001) и е основач и член на Мултимедија центар од Гевгелија.
– Оформена во духот на актуелното време, таа акцептира одделни поуки блиски на нејзината инвентивна природа а тие, пред се, се однесуваат на основната идеја дека целта на уметноста не е да го прикаже видливото, туку невидливото да го преобрази во видливо. Освен тоа, процесот на создавањето за неа е чин на ослободеност од стегите и препуштање на внатрешната творечка нужност…, информира МГС за изложбата на Крстева-Масети.
Таа е наградувана авторка, со над десет самостојни и повеќе од 60 групни изложби во Македонија и во странство. Учествувала на над 15 домашни и меѓународни ликовни колонии.