Во ликовниот салон на Центарот за култура „Марко Цепенков“ вечер ќе биде отворена изложбата на фотографии „Анаграми за себепрепознавање“ од Александар Ѓорѓиев.
На својата прва изложба во родниот Прилеп Ѓорѓиев ќе се претстави со 20 фотографии.
Фотографот Александар Ѓорѓиев работи во Министерството за култура, а неговата изложба е дел од годинашнава манифестација „Прилепско културно лето“.
Ѓорѓиев има богато професионално искуство како фотограф. Работел во „Нова Македонија“, во „Екран“. Неговите фотографии се дел од монографиите: „Слики со историска содржина“ за Музејот на македонската борба за државност и самостојност, во монографијата за Музејот на македонската борба за државност и самостојност, негови се фотографиите во „Спомен-куќа на Мајка Тереза“, го илустрирал „Македонскиот традиционален готвач“, потоа „Охридските пораки за мир и соживот“, „Градски трговски центар“.
Соработувал на фотографијата за филмовите: „Прашина“ на Милчо Манчевски, „Ангели на отпад“ на Димитар Османли и бил продуцент во филмот „Последниот валцер“ на Младен Крстевски.
Досега имал самостојни изложби во Словенија, Куманово, Крушево, Скопје и во Битола.