Во галеријата Империјал I во Културно-информативниот центар вечер ќе биде отворена изложбата „Мал формат“ на Друштвото на ликовните уметници на Македонија (ДЛУМ).
На отворањето на традиционалната изложба ДЛУМ ќе додели признанија од областа на ликовната и визуелната уметност: „Димитар Пандилов“ за сликарство, „Драгутин Аврамовски-Гуте“ за графика и „Димо Тодоровски“ за скулптура.
Културно-информативниот центар ќе ги додели наградите: „Методија Ивановски-Менде“, „Константин Мазев-Коце“ и „Вангел Коџоман“.
– Малиот формат како творечки предизвик претставува честа дневна практика на ликовните уметници. Магијата на „малиот квадрат“ во површина 25х25 сантиметри е искушение и за најголемите мајстори на визуелната уметност. Чувството на внатрешниот порив да го совлада малиот квадрат, на концизен, лапидарен, понекогаш метафоричен и езоповски начин да го транспонираат собитието и мотивот од големите форми во помалата мерка, соопшти ДЛУМ.