Вечерва, во Мобилна/ монтажна галерија, во 21 часот ќе биде отворена изложба на Снежана Алтипармак.
Делото „Фаќалки… за ветер во магла“ на Алтипармак, адаптирано во затворениот простор на монтажната галерија на Центарот за современи уметност-Скопје, претставува резултат на нејзиниот повеќегодишен интерес за инсталации кои се засноваат на движечки елементи. Истовремено, тоа е завршна фаза од нејзиното истражување за пост-дипломските студии на Факултетот за ликовни уметности во Скопје, магистерски проект одбранет во јуни 2014 година.
„Интересирајќи се во континуитет од студиските години, за техничко-технолошкиот напредок и неговата улога во менувањето на современите општества, како и за енормното производство на индустрискиот отпад, Снежана Алтипармак истото го става во контекст на преиспитување на односот помеѓу технологијата, артифициелноста и животот кој сè повеќе зависи од неа.
Чувствувајќи го притисокот на сложените општествени структури кои ја диктираат сликата за реалноста, пренесени и врз уметничкиот свет, Снежана Алтипармак, поставувајќи си себеси низа прашања кои ги споделува низ творечкиот континуитет, се наоѓа пред дилема околу ефективноста на метафората конструирана низ формите и механизмите кои ги конципира и проектира. Тоа може да се протолкува и како обид за излегување од востановената творечка матрица, и можеби најава за нова фаза во нејзината работа“, пишува Владимир Јанчевски во текстот за изложбата.