Владата на Република Македонија денеска напладне ќе ја одржи 12. седница на која ќе расправа за состојбите и напредокот во процесот на европската интеграција на државата.
Членовите на Владата ќе расправаат и за користењето и имплементацијата на фондовите од ЕУ, како и за статусот на реализација на приоритетите на Македонија за влез во НАТО и за статусот на реализација на Рамковниот договор.
На дневен ред на седницата се и повеќе точки меѓу кои и потребата за изменување на Националната стратегија и Акцискиот план за борба против тероризам, како и прашањето за утврдување распоред на работното време во Владата, министерствата и другите органи на државната управа.
На денешната седница ќе бидат разгледани и некои кадровски прашања и предлози од интерес на граѓаните.