Собранието попладнево ги усвои измените и дополнувањата на Законот за данокот на додадена вредност, со кои ДДВ на струјата за домаќинствата ќе се пресметува по стапка од пет отсто, наместо досегашната стапка од 18 отсто.
Намалената стапка согласно законското решение ќе се применува со денот на влегување во сила на Законот за измена и дополнување на Законот за данокот на додадена вредност, сѐ до 30 јуни 2022 година. По овој датум во наредната година, односно од 1 јули 2022 до 30 јуни 2023 година ќе се применува повластена даночна стапка од 10 проценти за прометот на електричната енергија кон домаќинствата.
Целта на воведување на повластените даночни стапка за прометот на електрична енергија кон домаќинставата е да се овозможи пониска цена за граѓаните и намалување на нивните трошоци, велат од Министерството за финансии, кое ги предложи измените.