Македонија од 31 место на „Форбс“ во 2014 година, падна на 68-то место на држави за водење бизнис, изјави денеска портпаролот на ВМРО-ДПМНЕ, Наум Стоилковски, на прес-конференција.
„Најмногу забелешки „Форбс“ има за владеењето на правото и нееднаквото спроведување на законите“, рече Стоилковски и додаде дека оценката на „Форбс“ е потврда на сите стравувања и укажувања од опозицијата.
Тој го осуди и покачувањето на платите на вицепремиерите за 8.000 денари месечно, а истовремено укажа и дека на сила се турка закон со кој секое јавно претпријатие во земјата треба да добие заменици директори.
„Се поставува прашањето колку може да отсуствуваат директорите, за да мора да бидат назначени нивни заменици, функционери со свои кабинети, секретарки, советници, шофери и секако можност за апанажа“, праша Стоилковски.