Синдикатот на администрацијата и државната управа (САДУ) при Конфедерацијата на слободни синдикати денеска реагираше на најновата одлука на Судскиот буџетски совет со која ретроактивно членовите на Советот и судиите ќе земат повисоки додатоци на плати за 35 проценти или по 21 илјада денари и за септември и за октомври.
– Минатиот месец г. Караџовски, претседател на Судскиот совет, како и на Судско-буџетскиот совет под изговор за еднократно зголемување на примањата по основ на додатоци на плата ја зголеми својата плата и на останатите во судовите, без судските службеници, за 35 проценти. Сега се гледа дека трајно решил со донесување на поеднечни одлуки да ги зголеми своите примања за 35 проценти, се вели во реакцијата.
Од Синдикатот потсетуваат дека во судовите работат и судски службеници и судска полиција кои не можат да си ги остварат своите права.
– Кога треба да се исплатат одредени побарувања за судските службеници, судската полиција и останатите вработени во судовите, тогаш сте крајно рестриктивни. Еден куп на судски спорови се водат за правата на судските службеници исто така засновани на закон, колективен договор и други прописи како што е предвидено по чл.3 од Законот за судска служба и никако неможат да си ги остварат правата со изговор дека нема пари во Судскиот буџет, истакнуваат од синдикатот.