Опозицискиот Сојуз за иднината најави дека караванот на отпорот го продолжува утре Скопје. Ќе почне во пет минути до 12 часот од три локации во градот, а трите каравани ќе се спојат пред зградата на Владата на Република Македонија. Покрај Скопје, во исто време, слични каравани ќе има и во поголемите градови низ државата.
– Отпорот на граѓаните, нивниот револт, како на улиците на Скопје, така и низ маршевите по градовите низ Републиката е се поголем и поголем. Покрај револтот од укинувањето на демократијата, промоцијата на насилството и одземањето на слободата, граѓаните се помасовно го искажуваат и својот револт од социјалната состојба во која се наоѓаат, сиромаштијата, урнисаниот стандард и најважно, чувството дека им се уништува и иднината, изјави денеска потпретседателот на СДСМ Зоран Јовановски на протестниот караван.
Според него, протестите се резултат на она што се случувало пред, а и на 24 декември, чија позадина, како што рече, се парите. Од една страна, рече, беше СДСМ со својот план за штедење, за запирање на неразумното задолжување и непродуктивното трошење, а од другата страна власта која, како што наведе, одлучила да ги прекрши и законоите, Деловникот и Уставот.